ਉੱਘੇ ਕਹਾਣੀਕਾਰ ਪਰਮਜੀਤ ਮਾਨ ਦੀ ਪੁਸਤਕ ਸਮੁੰਦਰਨਾਮਾ ਨੂੰ ਭਾਸ਼ਾ ਵਿਭਾਗ ਪੰਜਾਬ ਵੱਲੋਂ ਮਹਿੰਦਰ ਸਿੰਘ ਰੰਧਾਵਾ (ਗਿਆਨ ਸਾਹਿਤ) ਪੁਰਸਕਾਰ ਦੇਣ ਲਈ ਚੁਣਿਆ ਗਿਆ

ਸੁਰ ਸਾਂਝ ਡਾਟ ਕਾਮ ਨਾਲ ਗੱਲਬਾਤ ਕਰਦਿਆਂ ਪਰਮਜੀਤ ਮਾਨ ਨੇ ਕਿਹਾ ਕਿ ਸਮੁੰਦਰਨਾਮਾ ਇਕ ਵਿਲੱਖਣ ਕਿਸਮ ਦੀ ਕਿਤਾਬ ਹੈ ਜੋ ਸਮੁੰਦਰ, ਜਹਾਜ਼ ਤੇ ਜਹਾਜ਼ੀ ਲੋਕਾਂ ਦੀ ਜ਼ਿੰਦਗੀ ਬਾਰੇ ਜਾਣਕਾਰੀ ਭਰਪੂਰ ਹੈ। ਉਨ੍ਹਾਂ ਦੱਸਿਆ ਕਿ ਨਾਵਲਕਾਰ ਰਾਮ ਸਰੂਪ ਅਣਖੀ ਨੇ ਉਸ ਨੂੰ ਲਿਖਣ ਲਈ ਉਤਸ਼ਾਹਿਤ ਕੀਤਾ। ਅਣਖੀ ਸਾਹਿਬ ਕਿਹਾ ਕਰਦੇ ਸਨ ਕਿ ਸਾਡੇ ਕੋਲ ਪਿੰਡਾਂ ਦੀ ਜਾਣਕਾਰੀ ਹੈ ਤੇ ਅਸੀਂ ਲੋਕਾਂ ਨੇ ਪੰਜਾਬ ਦੇ ਪਿੰਡਾਂ ਬਾਰੇ ਲਿਖ ਲਿਖ ਢੇਰ ਲਾ ਦਿੱਤੇ ਹਨ। ਤੂੰ ਸਮੁੰਦਰ ਬਾਰੇ ਲਿਖ, ਪੰਜਾਬੀ ਪਾਠਕ ਨੂੰ ਕੋਈ ਨਵੀਂ ਜਾਣਕਾਰੀ ਮਿਲ਼ੇ। ਉਹਨਾਂ ਦੀ ਤੇ ਬਰਨਾਲੇ ਦੇ ਹੋਰ ਲੇਖਕਾਂ ਦੀ ਹੱਲਾਸ਼ੇਰੀ ਸਦਕਾ ਮੈਂ ਲਿਖਣ ਲੱਗਿਆਂ ਤੇ ਪਹਿਲੀ ਕਿਤਾਬ ਸਮੁੰਦਰ ਦਾ ਆਦਮੀ ਛਪੀ। ਅਲੱਗ ਕਿਸਮ ਦੀਆਂ ਕਹਾਣੀਆਂ ਹੋਣ ਕਰਕੇ ਜਿਸ ਨੇ ਵੀ ਪੜ੍ਹੀਆਂ ਹੋਰ ਹੱਲਾਸ਼ੇਰੀ ਦਿੱਤੀ।