ਜ਼ਿਲ੍ਹਾ ਰੂਪਨਗਰ ਵਿੱਚ ਲੱਗੀ ਨੰਨ੍ਹੇ ਮੁੰਨਿ੍ਆਂ ਦੀਆਂ ਮਾਤਾਵਾਂ ਦੀ ਵਰਕਸ਼ਾਪ

ਰੂਪਨਗਰ (ਸੁਰ ਸਾਂਝ ਬਿਊਰੋ) 29 ਮਈ,

ਸਿੱਖਿਆ ਵਿਭਾਗ ਦੇ ਹੁਕਮਾਂ ਤਹਿਤ ਰੂਪਨਗਰ ਜ਼ਿਲ੍ਹੇ ਦੇ ਹਰ ਸਰਕਾਰੀ ਪ੍ਰਾਇਮਰੀ ਸਕੂਲ ਵਿੱਚ ਮਾਤਾਵਾਂ ਦੀ ਵਰਕਸ਼ਾਪ ਲਾਈ ਗਈ। ਜ਼ਿਲ੍ਹਾ ਸਿੱਖਿਆ ਅਫ਼ਸਰ ਸ ਜਰਨੈਲ ਸਿੰਘ ਦੀ ਅਗਵਾਈ ਹੇਠ ਲਗਾਈ ਇਸ ਵਰਕਸ਼ਾਪ ਵਿੱਚ ਨੰਨ੍ਹੇ ਮੁੰਨ੍ਹੇ ਵਿਦਿਆਰਥੀਆਂ ਦੀਆਂ ਮਾਤਾਵਾਂ ਨੇ ਚਾਈਂ ਚਾਈਂ ਭਾਗ ਲਿਆ। ਇਸ ਸੰਬੰਧੀ ਜਾਣਕਾਰੀ ਦਿੰਦਿਆਂ ਪੜ੍ਹੋ ਪੰਜਾਬ ਪੜ੍ਹਾਓ ਪੰਜਾਬ ਦੇ ਜ਼ਿਲ੍ਹਾ ਕੋਆਰਡੀਨੇਟਰ ਰਾਬਿੰਦਰ ਸਿੰਘ ਰੱਬੀ ਨੇ ਦੱਸਿਆ ਕਿ ਉਕਤ ਵਰਕਸ਼ਾਪ ਵਿੱਚ ਮਾਤਾਵਾਂ ਨੂੰ ਵਿਦਿਆਰਥੀਆਂ ਦੀਆਂ ਲੋੜਾਂ ਅਤੇ ਸਮੱਸਿਆਵਾਂ ਬਾਰੇ ਵੀ ਜਾਗਰੂਕ ਕੀਤਾ ਗਿਆ। ਉਨ੍ਹਾਂ ਨੂੰ ਦੱਸਿਆ ਕਿ ਇੰਨੀ ਛੋਟੀ ਉਮਰ (ਪ੍ਰੀ ਪ੍ਰਾਇਮਰੀ) ਵਿੱਚ ਵਿਦਿਆਰਥੀਆਂ ਤੋਂ ਲਿਖਤੀ ਕੰਮ ਕਰਾਉਣਾ ਬਹੁਤ ਗ਼ਲਤ ਰੁਝਾਨ ਹੈ । ਇਸੇ ਕਾਰਨ ਵਿਦਿਆਰਥੀਆਂ ਨੂੰ ਵੱਖ ਵੱਖ ਗਤੀਵਿਧੀਆਂ ਕਰਾਈਆਂ ਜਾਂਦੀਆਂ ਹਨ । ਮਾਤਾਵਾਂ ਤੋਂ ਵੀ ਇਹ ਗਤੀਵਿਧੀਆਂ ਕਰਾਈਆਂ ਗਈਆਂ।

ਇਸ ਮੌਕੇ ਮਾਤਾਵਾਂ ਨੇ ਮਖੌਟੇ ਬਣਾਉਣਾ, ਹੱਥੀਂ ਕੋਈ ਵੀ ਟੀ ਐੱਲ ਐਮ ਤਿਆਰ ਕਰਨੀ, ਗੱਤੇ ਨਾਲ਼ ਗੋਲ਼, ਚੌਰਸ, ਤਿਕੋਣਾ ਮੋੜਨਾ, ਬੁਲਬੁਲਾ ਫੁਲਾਉਣਾ ਅਤੇ ਹੋਰ ਅਨੇਕਾਂ ਗਤੀਵਿਧੀਆਂ ਕਰਾਈਆਂ ਗਈਆਂ । ਇਸ ਦੀ ਦੇਖ ਰੇਖ ਉੱਪ ਜ਼ਿਲ੍ਹਾ ਸਿੱਖਿਆ ਅਫਸਰ ਸ ਚਰਨਜੀਤ ਸਿੰਘ ਸੋਢੀ, ਮੈਡਮ ਰੰਜਨਾ ਕਟਿਆਲ ਅਤੇ ਲਖਵਿੰਦਰ ਸਿੰਘ ਨੇ ਕੀਤੀ । ਯਾਦ ਰੱਖਣ ਯੋਗ ਗੱਲ ਇਹ ਹੈ ਕਿ ਇਹ ਵਰਕਸ਼ਾਪ ਸਾਲ ਵਿੱਚ ਚਾਰ ਵਾਰ ਲੱਗੇਗੀ । ਮਾਤਾਵਾਂ ਨੇ ਇਸ ਵਰਕਸ਼ਾਪ ਨੂੰ ਸ਼ੁੱਭ ਸ਼ਗਨ ਆਖਿਆ ਅਤੇ ਮਨੋਰੰਜਨ ਦੇ ਨਾਲ਼ ਨਾਲ਼ ਉਨ੍ਹਾਂ ਨੇ ਬਹੁਤ ਗਿਆਨ ਵੀ ਪ੍ਰਾਪਤ ਕੀਤਾ । ਸਰਕਾਰੀ ਪ੍ਰਾਇਮਰੀ ਸਕੂਲ ਮੜੌਲੀ ਕਲਾਂ ਵਿੱਚ ਇਹ ਵਰਕਸ਼ਾਪ ਮੈਡਮ ਜੋਤੀ ਮਰਾਠਾ (ਸਟੇਟ ਰਿਸੋਰਸ ਪਰਸਨ)  ਨੇ ਬਾਖੂਬੀ ਲਾਈ । ਇਸ ਮੌਕੇ ਸਕੂਲ ਮੁਖੀ ਦਲਵਿੰਦਰ ਸਿੰਘ, ਮੈਡਮ ਸੁਰੇਸ਼ ਲਤਾ ਅਤੇ ਕਮਲਦੀਪ ਸਿੰਘ ਤੋਂ ਇਲਾਵਾ ਵੱਡੀ ਗਿਣਤੀ ਵਿੱਚ ਮਾਤਾਵਾਂ ਨੇ ਭਾਗ ਲਿਆ।