ਪੌੜੀਆਂ ਉਤਰਦੀ ਛਾਂ ‘ਤੇ ਵਿਚਾਰ ਚਰਚਾ ਤੇ ਕਵੀ ਦਰਬਾਰ

ਖਰੜ (ਸੁਰ ਸਾਂਝ ਡਾਟ ਕਾਮ ਬਿਊਰੋ), 6 ਅਗਸਤ:

ਸਾਹਿਤਕ ਮੰਚ, ਖਰੜ ਵੱਲੋਂ ਸੀਨੀਅਰ ਸਿਟੀਜਨ ਕੌਂਸਲ ਖਰੜ ਵਿਖੇ ਉੱਘੇ ਕਵੀ ਜਗਦੀਪ ਸਿੱਧੂ ਦੀ ਚਰਚਿਤ ਕਾਵਿ-ਕਿਤਾਬ “ਪੌੜੀਆਂ ਉਤਰਦੀ ਛਾਂ” ਬਾਰੇ ਵਿਚਾਰ ਚਰਚਾ ਕਰਵਾਈ ਗਈ। ਉੱਘੇ ਵਿਦਵਾਨ ਆਲੋਚਕ ਡਾ. ਲਾਭ ਸਿੰਘ ਖੀਵਾ ਵੱਲੋਂ ਇਸ ਸਮਾਗਮ ਦੀ ਪ੍ਰਧਾਨਗੀ ਕੀਤੀ ਗਈ ਅਤੇ ਮੁੱਖ ਮਹਿਮਾਨ ਵਜੋਂ  ਡਾ. ਸੰਜੀਵ ਕੁਮਾਰ, ਉਪ ਮੰਡਲ ਅਫਸਰ ਖਮਾਣੋਂ ਸ਼ਾਮਿਲ ਹੋਏ। ਵਿਚਾਰ ਚਰਚਾ ਦੀ ਸ਼ੁਰੂਆਤ ਕਰਦਿਆਂ ਸਭ ਤੋਂ ਪਹਿਲਾਂ ਮੰਚ ਦੇ ਪ੍ਰਧਾਨ ਕਾਲਮ ਨਵੀਸ ਤਰਸੇਮ ਬਸ਼ਰ ਨੇ ਆਏ ਸਭ ਮਹਿਮਾਨਾਂ ਦਾ ਧੰਨਵਾਦ ਕੀਤਾ। ਇਸ ਤੋਂ ਬਾਅਦ ਜਗਦੀਪ ਸਿੱਧੂ ਨੇ ਆਪਣੀਆਂ ਕਵਿਤਾਵਾਂ ਸਰੋਤਿਆਂ ਨਾਲ ਸਾਂਝੀਆਂ ਕੀਤੀਆਂ। ਵਿਚਾਰ ਚਰਚਾ ਦਾ ਆਰੰਭ ਪੰਜਾਬ ਯੂਨੀਵਰਸਿਟੀ ਚੰਡੀਗੜ੍ਹ ਦੇ ਪ੍ਰੋਫੈਸਰ ਤੇ  ਆਲੋਚਕ ਡਾ. ਪ੍ਰਵੀਨ ਕੁਮਾਰ ਨੇ ਕੀਤਾ। ਉਹਨਾਂ ਕਿਹਾ ਕਿ ਜਗਦੀਪ ਦੀ ਕਵਿਤਾ ਜ਼ਿੰਦਗੀ ਦੀ ਕਿਸੇ ਆਸ ਨਾਲ ਬੱਝੀ ਕਵਿਤਾ ਹੈ। ਇਹ ਕਵਿਤਾ ਇਕ ਨਵੀਂ ਵਿਚਾਰਧਾਰਾ ਪੈਦਾ ਕਰਦੀ ਹੈ। ਉਹਨਾਂ ਅੱਗੇ ਕਿਹਾ ਕਿ ਇਹਨਾਂ ਕਵਿਤਾਵਾਂ ਵਿਚ ਬਚਪਨ ਤੋਂ ਲੈ ਕੇ ਬੁਢਾਪੇ ਤਕ ਛੋਟੇ ਛੋਟੇ ਬਿਰਤਾਂਤ ਸਾਹ ਲੈਂਦੇ ਨੇ। ਇਸ ਤੋਂ ਬਾਅਦ ਪ੍ਰਿੰਸੀਪਲ ਸਤਨਾਮ ਸਿੰਘ ਸ਼ੋਕਰ ਨੇ ਇਸ ਕਿਤਾਬ ਦੇ ਮਰਮ ਬਾਰੇ ਬੋਲਦਿਆਂ ਕਿਹਾ ਕਿ ਇਹ ਕਵਿਤਾਵਾਂ ਤੁਹਾਨੂੰ ਟੁੰਬਦੀਆਂ ਹੋਈਆਂ ਕਿਸੇ ਹੋਰ ਹੀ ਸੰਸਾਰ ਵਿਚ ਲੈ ਜਾਂਦੀਆਂ ਹਨ, ਜਿੱਥੇ ਮਹੁੱਬਤ ਹੈ, ਆਸ ਹੈ, ਧਰਵਾਸ ਹੈ, ਬਚਪਨ ਤੇ ਬੁਢਾਪਾ ਹੈ।

ਇਸ ਤੋਂ ਬਾਅਦ ਉੱਘੇ ਆਲੋਚਕ ਡਾ. ਲਾਭ ਸਿੰਘ ਖੀਵਾ ਨੇ ਕਿਹਾ ਕਿ ਕਿਤਾਬ ਦੀਆਂ ਚਹੁੱਤਰ ਕਵਿਤਾਵਾਂ ਸਿਰਜਣਾ ਨੇ ਘਾੜਤ ਨਹੀਂ। ਇਹਨਾਂ ਕਵਿਤਾਵਾਂ ਵਿਚ ਡੁੰਘੀ ਕਾਵਿਕਤਾ ਤੇ ਸੰਵੇਦਨਾ ਪਈ ਹੈ। ਕਵੀ ਸੂਖ਼ਮਤਾ ਤੋਂ ਸੂਖ਼ਮਤਾ ਕੱਢਦਾ ਹੈ। ਉਹਨਾਂ ਅੱਗੇ ਕਿਹਾ ਕਿ ਜਗਦੀਪ ਨਵੇਂ  ਸਮੇਂ ਅਨੁਸਾਰ ਨਵੇਂ ਨਵੇਂ ਸ਼ਬਦਾਂ ਦਾ ਪ੍ਰਯੋਗ ਕਰਦਾ ਹੈ।

ਆਖ਼ਰ ਵਿਚ ਇਸ ਸਮਾਗਮ ਦੇ ਮੁੱਖ ਮਹਿਮਾਨ ਡਾ. ਸੰਜੀਵ ਕੁਮਾਰ ਐਸ.ਡੀ.ਐਮ ਖਮਾਣੋ ਨੇ ਕਿਹਾ ਕਿ ਮੈਂ ਇਸ ਕਿਤਾਬ ਤੋਂ ਪ੍ਰਭਾਵਿਤ ਹੋਇਆ ਹਾਂ, ਇਹ ਜੀਵਨ ਦੀ ਸਮੁੱਚਤਾ ਦੀਆਂ ਕਵਿਤਾਵਾਂ ਨੇ। ਉਹਨਾਂ ਅਗਲੀ ਗੱਲ ਕਰਦੇ ਹੋਏ ਕਿਹਾ ਕਿ ਪੌੜੀਆਂ ਚੜ੍ਹਨ ਦਾ ਹੀ ਹਰ ਥਾਂ ਹਾਂ ਪੱਖੀ ਪ੍ਰਤੀਕ ਹੈ ਪਰ ਕਿਤਾਬ ਦੇ ਟਾਈਟਲ “ਪੌੜੀਆਂ ਉਤਰਦੀ ਛਾਂ” ਵਿਚ ਵੀ ਇਕ ਸਕੂਨ ਵਿਚ ਪਰਤਣ ਦਾ ਬਿੰਬ ਹੈ। ਉਹਨਾਂ ਇਸ ਤਰ੍ਹਾਂ ਦੇ ਸਮਾਗਮ ਕਰਵਾਉਣ ਲਈ ਮੰਚ ਦੀ ਸ਼ਲਾਘਾ ਕੀਤੀ। ਮੰਚ ਵੱਲੋਂ ਸਾਰੇ ਆਏ ਮਹਿਮਾਨਾਂ ਦਾ ਕਿਤਾਬਾਂ ਭੇਂਟ ਕਰਕੇ ਸਨਮਾਨ ਕੀਤਾ ਗਿਆ। ਮੰਚ ਸੰਚਾਲਨ ਮੰਚ ਦੇ ਜਨਰਲ ਸਕੱਤਰ ਸੁਰਜੀਤ ਸੁਮਨ ਵੱਲੋਂ ਬਾਖ਼ੂਬੀ ਨਿਭਾਇਆ ਗਿਆ। ਇਸ ਸਮਾਗਮ ਵਿੱਚ ਸੀਨੀਅਰ ਸਿਟੀਜਨ ਕੌਂਸਲ ਦੇ ਪ੍ਰਧਾਨ ਹਰਦੀਪ ਸਿੰਘ ਬਾਜਵਾ ਵਿਸ਼ੇਸ਼ ਤੌਰ ਤੇ ਸ਼ਾਮਿਲ ਹੋਏ ਤੇ ਅੰਤਰਰਾਸ਼ਟਰੀ ਅਲਗੋਜ਼ਾਵਾਦਕ ਕਰਮਜੀਤ ਸਿੰਘ ਬੱਗਾ ਨੇ ਆਪਣੇ ਫਨ ਦਾ ਮੁਜ਼ਾਹਰ ਕਰਦੇ ਹੋਏ ਕਾਵਿਮਈ ਵਾਤਾਵਰਣ ਨੂੰ ਸੰਗੀਤਕ ਰੰਗਤ ਵਿੱਚ ਰੰਗ ਦਿੱਤਾ। ਇਸ ਮੌਕੇ ਪ੍ਰੀਤਲੜੀ ਮੈਗਜ਼ੀਨ ਦੇ ਤਾਜ਼ਾ ਅੰਕ ਨੂੰ ਵੀ ਲੋਕ ਅਰਪਣ ਕੀਤਾ ਗਿਆ।

ਇਸ ਮੌਕੇ ਹੋਏ ਕਵੀ ਦਰਬਾਰ ਵਿੱਚ ਤਰਸੇਮ ਸਿੰਘ ਕਾਲ਼ੇਵਾਲ਼, ਮਨਜੀਤ ਸਿੰਘ ਮਝੈਲ, ਮਲਕੀਤ ਸਿੰਘ ਨਾਗਰਾ, ਰਾਜਿੰਦਰ ਸਿੰਘ ਗੱਡੂ, ਬਲਵਿੰਦਰ ਸਿੰਘ, ਧਿਆਨ ਸਿੰਘ ਕਾਹਲ਼ੋ, ਅਜਮੇਰ ਸਾਗਰ, ਉੱਘੇ ਗਾਇਕ ਬਾਬੂ ਚੰਡੀਗੜ੍ਹੀਆ, ਪਿਆਰਾ ਸਿੰਘ ਰਾਹੀ, ਜਸਵਿੰਦਰ ਸਿੰਘ ਕਾਈਨੌਰ, ਜਸਵੀਰ ਸਿੰਘ ਮਹਿਰਾ ਅਤੇ ਗੁਰਪਾਲ ਸਿੰਘ ਹੋਰਾਂ ਆਪਣੀਆਂ ਰਚਨਾਵਾਂ ਸੁਣਾਈਆਂ। ਇਨ੍ਹਾਂ ਤੋਂ ਇਲਾਵਾ ਉੱਘੇ ਗਜ਼ਲਗੋ ਹਰਨਾਮ ਸਿੰਘ ਡੱਲਾ, ਨਾਵਲਕਾਰ ਸੰਤਵੀਰ, ਸਮੁੰਦਰਨਾਮਾ ਦੇ ਲੇਖਕ ਪਰਮਜੀਤ ਮਾਨ, ਡਾ. ਜਤਿੰਦਰ ਮਾਨ, ਇੰਦਰਜੀਤ ਪ੍ਰੇਮੀ, ਚਰਚਿਤ ਕਹਾਣੀਕਾਰ ਸਰੂਪ ਸਿਆਲ਼ਵੀ, ਮੋਹਣ ਲਾਲ ਰਾਹੀ, ਸੁਰੇਸ਼ ਕੁਮਾਰ ਅਤੇ ਸੁਦਾਗਰ ਸਿੰਘ ਪਾਲ ਨੇ ਵਿਸ਼ੇਸ਼ ਤੌਰ ਤੇ ਸ਼ਿਰਕਤ ਕੀਤੀ।