ਚਾਰ ਰੋਜ਼ਾ ਆਰਕਐਕਸ ਪ੍ਰਦਰਸ਼ਨੀ ਪਰੇਡ ਗਰਾਊਂਡ ਸੈਕਟਰ 17 ਵਿਖੇ ਧੂਮਧਾਮ ਨਾਲ ਸ਼ੁਰੂ
ਪ੍ਰਦਰਸ਼ਨੀ ਵਿੱਚ ਦਿਖਾਏ ਇੰਟੀਰੀਅਰ ਤੇ ਬਿਲਡਿੰਗ ਸਮੱਗਰੀ ਦੇ ਨਵੀਨਤਮ ਉਤਪਾਦ
ਚੰਡੀਗੜ੍ਹ (ਹਰਦੇਵ ਚੌਹਾਨ-ਸੁਰ ਸਾਂਝ ਡਾਟ ਕਾਮ ਬਿਊਰੋ), 17 ਫਰਵਰੀ:
ਚਾਰ ਰੋਜ਼ਾ ਆਰਕਐਕਸ ਐਕਸਪੋ ਸੈਕਟਰ 17 ਦੇ ਪਰੇਡ ਗਰਾਊਂਡ ਵਿਖੇ ਧੂਮਧਾਮ ਨਾਲ ਸ਼ੁਰੂ ਹੋਇਆ। ਇਸ ਵਿਚ ਇੰਟੀਰੀਅਰ, ਐਕਸਟੀਰੀਅਰ ਅਤੇ ਬਿਲਡਿੰਗ ਸਮੱਗਰੀ ਵਿੱਚ ਨਵੀਨਤਮ ਉਤਪਾਦਾਂ ਦਾ ਪ੍ਰਦਰਸ਼ਨ ਕੀਤਾ ਗਿਆ। ਐਕਸਪੋ ਦਾ ਉਦਘਾਟਨ ਮੁੱਖ ਮਹਿਮਾਨ ਏ.ਆਰ ਸ਼ਿਵ ਦੱਤ ਸ਼ਰਮਾ ਨੇ ਰੀਬਨ ਕੱਟ ਕੇ ਕੀਤਾ। ਇਸ ਐਕਸਪੋ ਨੂੰ ਦੇਖਣ ਲਈ ਲੋਕ ਪਹਿਲੇ ਦਿਨ ਹੀ ਵੱਡੀ ਗਿਣਤੀ ਵਿੱਚ ਪਹੁੰਚੇ, ਜਿਸ ਨੂੰ ਬਹੁਤ ਪਸੰਦ ਕੀਤਾ ਗਿਆ। ਪ੍ਰਦਰਸ਼ਨੀ ਦੇ ਪਹਿਲੇ ਦਿਨ ਚੰਡੀਗੜ੍ਹ ਦੇ ਨਾਲ-ਨਾਲ ਬਾਹਰੋਂ ਵੀ ਲੋਕਾਂ ਨੇ ਪ੍ਰਦਰਸ਼ਨੀ ਵਿੱਚ ਸ਼ਿਰਕਤ ਕੀਤੀ।
ਮਾਈਂਡਜ਼ ਮੀਡੀਆ ਅਤੇ ਮੈਨੇਜਮੈਂਟ ਵੱਲੋਂ ਲਗਾਈ ਗਈ ਇਸ ਪ੍ਰਦਰਸ਼ਨੀ ਬਾਰੇ ਜਾਣਕਾਰੀ ਦਿੰਦਿਆਂ ਮਾਈਂਡਜ਼ ਮੀਡੀਆ ਮੈਨੇਜਮੈਂਟ ਐਂਡ ਪ੍ਰਾਈਵੇਟ ਲਿਮਟਿਡ ਦੇ ਡਾਇਰੈਕਟਰ ਇੰਦਰ ਢੀਂਗੜਾ, ਮਨਜੀਤ ਸਿੰਘ, ਰਾਕੇਸ਼ ਸਿੰਘ ਅਤੇ ਬੀ.ਐਸ.ਰਾਣਾ ਨੇ ਦੱਸਿਆ ਕਿ ਪ੍ਰਦਰਸ਼ਨੀ ਵਿੱਚ 200 ਤੋਂ ਵੱਧ ਸਟਾਲਾਂ ‘ਤੇ 3000 ਦੇ ਕਰੀਬ ਨਵੇਂ ਉਤਪਾਦ ਪ੍ਰਦਰਸ਼ਿਤ ਕੀਤੇ ਗਏ ਹਨ। ਵਰਨਣਯੋਗ ਹੈ ਕਿ ਇਸ ਐਕਸਪੋ ਵਿੱਚ ਦੇਸ਼-ਵਿਦੇਸ਼ ਦੀਆਂ ਨਾਮੀ ਕੰਪਨੀਆਂ ਹਿੱਸਾ ਲੈ ਰਹੀਆਂ ਹਨ।
ਐਕਸਪੋ ਦੇ ਉਦਘਾਟਨ ਮੌਕੇ ਬੋਲਦਿਆਂ ਮਾਈਂਡ ਮੀਡੀਆ ਐਂਡ ਮੈਨੇਜਮੈਂਟ ਦੇ ਡਾਇਰੈਕਟਰ ਇੰਦਰ ਢੀਂਗਰਾ, ਮਨਜੀਤ ਸਿੰਘ, ਰਾਕੇਸ਼ ਸਿੰਘ ਅਤੇ ਬੀ.ਐਸ. ਰਾਣਾ ਨੇ ਕਿਹਾ ਕਿ ਇਹ ਐਕਸਪੋ ਉਨ੍ਹਾਂ ਲੋਕਾਂ ਲਈ ਹੈ, ਜੋ ਆਪਣੇ ਸੁਪਨਿਆਂ ਦਾ ਘਰ ਬਣਾਉਣ ਦੀ ਤਿਆਰੀ ਕਰ ਰਹੇ ਹਨ ਅਤੇ ਨਵੀਨਤਮ ਰੁਝਾਨਾਂ ਤੇ ਉਤਪਾਦਾਂ ਤੋਂ ਜਾਣੂ ਹੋਣਾ ਚਾਹੁੰਦੇ ਹਨ, ਇਹ ਪ੍ਰਦਰਸ਼ਨੀ ਉਨ੍ਹਾਂ ਲਈ ਬਹੁਤ ਲਾਭਦਾਇਕ ਸਾਬਤ ਹੋਵੇਗੀ। ਉਨ੍ਹਾਂ ਦੱਸਿਆ ਕਿ ਇਸ ਪ੍ਰਦਰਸ਼ਨੀ ਵਿੱਚ ਸ਼ਹਿਰ ਦੇ ਉੱਘੇ ਉਦਯੋਗਪਤੀ ਅਤੇ ਦੇਸ਼ ਭਰ ਦੇ ਨਾਮਵਰ ਆਰਕੀਟੈਕਟ ਭਾਗ ਲੈ ਰਹੇ ਹਨ।
ਉਨ੍ਹਾਂ ਦੱਸਿਆ ਕਿ ਪ੍ਰਦਰਸ਼ਨੀ ਵਿੱਚ ਪ੍ਰਦਰਸ਼ਿਤ ਕੀਤੇ ਜਾਣ ਵਾਲੇ ਉਤਪਾਦਾਂ ਅਤੇ ਸ਼੍ਰੇਣੀਆਂ ਵਿੱਚ ਸਜਾਵਟੀ ਲਾਈਟ, ਬਾਥ, ਸੈਨੇਟਰੀ, ਟਾਈਲਾਂ, ਸੁਰੱਖਿਆ, ਘਰ, ਆਟੋਮੇਸ਼ਨ, ਰਸੋਈ, ਫਰਨੀਚਰ, ਦਰਵਾਜ਼ਾ, ਖਿੜਕੀ, ਲਿਫਟ, ਇਲੈਕਟ੍ਰੀਕਲ, ਤਾਰ, ਕੇਬਲ, ਪਾਣੀ ਪ੍ਰਬੰਧਨ, ਛੱਤਾਂ, ਹਾਰਡਵੇਅਰ, ਬਿਲਡਿੰਗ ਸਮੱਗਰੀ, ਕੱਚ, ਪਲੰਬਿੰਗ, ਪਾਈਪ, ਫਿਟਿੰਗਸ, ਸੋਲਰ ਸਿਸਟਮ, ਲੈਂਡਸਕੇਪ, ਗਾਰਡਨ, ਫਲੋਰਿੰਗ ਆਦਿ ਪ੍ਰਮੁੱਖ ਹਨ। ਉਨ੍ਹਾਂ ਦੱਸਿਆ ਕਿ ਪ੍ਰਦਰਸ਼ਨੀ ਦੇ ਆਖਰੀ ਦਿਨ ਵਧੀਆ ਪ੍ਰਦਰਸ਼ਨ ਕਰਨ ਵਾਲੀਆਂ ਕੰਪਨੀਆਂ ਦੇ ਨਿਵੇਕਲੇ ਸਟਾਲਾਂ ਨੂੰ ਇਨਾਮ ਦਿੱਤੇ ਜਾਣਗੇ।
ਇਸ ਮੌਕੇ ਮਨਮੋਹਨ ਖੰਨਾ ਚੇਅਰਮੈਨ ਆਈ.ਆਈ.ਏ ਚੰਡੀਗੜ੍ਹ ਚੈਪਟਰ, ਜਗਜੀਤ ਸਿੰਘ ਪ੍ਰਧਾਨ ਸੀ.ਆਰ.ਈ.ਡੀ.ਏ.ਆਈ ਪੰਜਾਬ, ਬਲਜੀਤ ਸਿੰਘ ਪ੍ਰਧਾਨ ਮੁਹਾਲੀ ਇੰਡਸਟਰੀ ਐਸੋਸੀਏਸ਼ਨ, ਸੁਰਿੰਦਰ ਬਾਹਗਾ ਪ੍ਰਧਾਨ ਐਫ.ਐਸ.ਏ.ਆਈ ਚੰਡੀਗੜ੍ਹ ਚੈਪਟਰ, ਗੁਰਵਿੰਦਰ ਸਿੰਘ ਸਚਦੇਵਾ ਪ੍ਰਧਾਨ ਪੰਜਾਬ ਸੈਨੇਟਰੀ ਐਂਡ ਪਾਈਪ ਟਰੇਡਰਜ਼ ਐਸੋਸੀਏਸ਼ਨ, ਗੁਰਮੀਤ ਸਿੰਘ ਕੁਲਾਰ ਪ੍ਰਧਾਨ ਐਫ.ਆਈ.ਐਸ.ਓ. ਇੰਡਸਟਰੀਅਲ ਐਂਡ ਕਮਰਸ਼ੀਅਲ ਐਸੋਸੀਏਸ਼ਨ ਲੁਧਿਆਣਾ ਅਤੇ ਤਰਲੋਚਨ ਸਿੰਘ ਪ੍ਰਧਾਨ ਐਸੋਸੀਏਸ਼ਨ ਆਫ ਲੁਧਿਆਣਾ ਮਸ਼ੀਨ ਟੂਲ ਇੰਡਸਟਰੀ (ਏ.ਐਲ.ਐਮ.ਟੀ.ਆਈ.) ਨੇ ਵੀ ਸ਼ਮੂਲੀਅਤ ਕੀਤੀ।
