ਸਾਹਿਤ ਵਿਗਿਆਨ ਕੇਂਦਰ ਚੰਡੀਗੜ੍ਹ ਵਲੋਂ ਤ੍ਰੈਭਾਸ਼ੀ ਕਵੀ-ਦਰਬਾਰ

ਚੰਡੀਗੜ੍ਹ (ਸੁਰ ਸਾਂਝ ਡਾਟ ਕਾਮ ਬਿਊਰੇ), 7 ਜੂਨ:

ਸਾਹਿਤ ਵਿਗਿਆਨ ਕੇਂਦਰ ਚੰਡੀਗੜ੍ਹ ਦੀ ਵਿਸ਼ੇਸ਼ ਇਕੱਤਰਤਾ ਕਮਿਊਨਿਟੀ ਸੈਂਟਰ ਸੈਕਟਰ 43 ਚੰਡੀਗੜ੍ਹ ਵਿਖੇ ਹੋਈ ਜਿਸ ਦੇ ਪ੍ਰਧਾਨਗੀ ਮੰਡਲ ਵਿਚ ਸ੍ਰੀਮਤੀ ਪ੍ਰੇਮ ਲਤਾ ( ਕੌਂਸਲਰ), ਸ੍ਰੀ ਕੇ. ਕੇ.ਸ਼ਾਰਦਾ ( ਚੇਅਰਮੈਨ, ਖਾਦੀ ਸੇਵਾ ਸੰਘ), ਪ੍ਰੇਮ ਵਿੱਜ (ਉੱਘੇ ਸਾਹਿਤਕਾਰ), ਡਾ: ਅਵਤਾਰ ਸਿੰਘ ਪਤੰਗ (ਉੱਘੇ ਸਾਹਿਤਕਾਰ), ਗੁਰਦਰਸ਼ਨ ਸਿੰਘ ਮਾਵੀ (ਕੇਂਦਰ ਦੇ ਪ੍ਰਧਾਨ) ਸੁਸ਼ੋਭਿਤ ਸਨ। ਮਾਵੀ ਜੀ ਨੇ ਸਭ ਨੂੰ ਜੀ ਆਇਆਂ ਆਖਿਆ ਅਤੇ ਸਾਹਿਤਕਾਰਾਂ ਦੇ ਸਮਾਜ ਵਿਚ ਪਾਏ ਯੋਗਦਾਨ ਦੀ ਸ਼ਲਾਘਾ ਕੀਤੀ। ਪ੍ਰੋਗਰਾਮ ਦੀ ਸ਼ੁਰੂਆਤ ਪ੍ਰੇਮ ਵਿੱਜ ਵਲੋਂ ਕਵਿਤਾ ਸੁਣਾਉਣ ਅਤੇ ਇਸ ਪ੍ਰੋਗਰਾਮ ਦੀ ਮਹਤੱਤਾ ਬਾਰੇ ਦੱਸਣ ਨਾਲ ਹੋਈ। ਪ੍ਰਤਾਪ ਪਾਰਸ ਨੇ ਆਪਣੀ ਗਜ਼ਲ ਦੀ ਤਰੰਨਮ ਵਿਚ ਖੂਬਸੂਰਤ ਪੇਸ਼ਕਾਰੀ ਕੀਤੀ। ਡਾ. ਸੰਗੀਤਾ ਸ਼ਰਮਾ ਕੁੰਦਰਾ, ਵਿਮਲਾ ਗੁਗਲਾਨੀ, ਡਾ. ਨਿਰਮਲ ਸੂਦ, ਡਾ. ਵਿਨੋਦ ਸ਼ਰਮਾ, ਵਿਜੇ ਕਪੂਰ, ਹਰਿੰਦਰ ਸਿਨਹਾ, ਰਜਿੰਦਰ ਕੌਰ ਨੇ ਸਮਾਜਿਕ ਸਰੋਕਾਰ ਵਾਲੀਆਂ ਸੋਹਣੀਆਂ ਹਿੰਦੀ ਕਵਿਤਾਂਵਾਂ ਸੁਣਾਈਆਂ। ਰਤਨ ਬਾਬਕਵਾਲਾ ( ਤੂੰਬੀ ਨਾਲ), ਸਰਬਜੀਤ ਸਿੰਘ ਪੱਡਾ, ਗੁਰਦਾਸ ਸਿੰਘ ਦਾਸ (ਤੂੰਬੀ ਨਾਲ) ਦਵਿੰਦਰ ਕੌਰ ਢਿੱਲੋਂ, ਲਾਭ ਸਿੰਘ ਲਹਿਲੀ (ਤੂੰਬੀ ਨਾਲ), ਭਰਪੂਰ ਸਿੰਘ ਆਦਿ ਸਭ ਨੇ ਆਪਣੇ ਲਿਖੇ  ਬਹੁਤ ਵਧੀਆ ਗੀਤ ਪੇਸ਼ ਕੀਤੇ।

ਗੁਰਦਰਸ਼ਨ ਸਿੰਘ ਮਾਵੀ, ਬਲਵਿੰਦਰ ਸਿੰਘ ਢਿੱਲੋਂ, ਰਮਨਦੀਪ ਕੌਰ ਰਮਣੀਕ, ਨਰਿੰਦਰ ਕੌਰ ਲੌਂਗੀਆ, ਪਿਆਰਾ ਸਿੰਘ ਰਾਹੀ ਨੇ ਗਜ਼ਲਾਂ ਅਤੇ ਕਵਿਤਾਵਾਂ ਪੇਸ਼ ਕੀਤੀਆਂ। ਪ੍ਰੇਮ ਲਤਾ ਨੇ ਕਿਹਾ ਕਿ ਮੇਰੀਆਂ ਸੇਵਾਵਾਂ ਹਮੇਸ਼ਾ ਸਾਹਿਤਕਾਰਾਂ ਲਈ ਸਮਰਪਿਤ ਹਨ। ਸਾਹਿਤਕਾਰ ਆਪਣੇ ਦੇਸ਼ ਦੀ ਸੰਸਕ੍ਰਿਤੀ, ਇਤਹਾਸ ਅਤੇ ਰੀਤੀ- ਰਿਵਾਜ਼ਾਂ ਨੂੰ ਜਿਊਂਦਾ ਰੱਖਦੇ ਹਨ। ਕੇ. ਕੇ. ਸ਼ਾਰਦਾ ਨੇ ਪ੍ਰੋਗਰਾਮ ਦੀ ਸ਼ਲਾਘਾ ਕਰਦਿਆਂ ਕਿਹਾ ਕਿ ਹਿੰਦੀ, ਪੰਜਾਬੀ, ਉਰਦੂ, ਅੰਗਰੇਜੀ ਦੇ ਰਲਵੇਂ-ਮਿਲਵੇਂ ਪ੍ਰੋਗਰਾਮ ਹੋਣਾ ਚੰਗੀ ਗੱਲ ਹੈ। ਅਖੀਰ ਵਿਚ ਡਾ. ਅਵਤਾਰ ਸਿੰਘ ਪਤੰਗ ਨੇ ਸਭ ਦਾ ਧੰਨਵਾਦ ਕਰਦਿਆਂ ਆਖਿਆ ਕਿ “ਸ਼ਬਦ” ਨੇ ਸਾਨੂੰ ਸਭ ਨੂੰ ਜੋੜ ਰੱਖਿਆ ਹੈ। ਸਾਹਿਤਕਾਰਾਂ ਦੇ ਸੰਵਾਦ ਹੁੰਦੇ ਰਹਿਣੇ ਚਾਹੀਦੇ ਹਨ। ਇਸ ਮੌਕੇ ਵੱਡੀ ਗਿਣਤੀ ਵਿਚ ਚੰਡੀਗੜ੍ਹ, ਮੋਹਾਲੀ, ਪੰਚਕੂਲਾ ਤੋਂ ਪਤਵੰਤੇ ਸੱਜਣ, ਵਿਦਵਾਨ ਅਤੇ ਲੇਖਕ ਹਾਜ਼ਰ ਸਨ।